- on.cc 東方互動主頁
- 4月13日 (日)
負責就青年事務向政府提意見嘅青年事務委員會，近年不時被外界批評委員年紀偏大，未能真正反映青年嘅想法。立法會議員田北辰（田二少）尋日喺特首答問大會上亦批評，青年事務委會全部委員都由政府委任，唔少仲係富二代、區議員及非青年阿叔，對青年了解好有限。不過，無論係已卸任主席嘅李宗德（Joseph），抑或現任主席陳振彬（Bunny）都唔認同，仲建議田二少了解多啲該委員會委員嘅背景喎。
Joseph話，唔好太着重委員係咪富二代，佢哋身為大企業嘅代表，係有責任就青年事務畀意見，而且好多政策需要靠佢哋幫手執行。至於好多委員都係「非青年阿叔」，Joseph話年紀大啲嘅委員多數擔任高級職位，時間上有較大彈性，相反後生仔規限多，要兼顧讀書同工作，技術上未必能夠應付到定期開會，所以劃一規定委員歲數未必係好事。
Bunny就回應話，委員會內有青年團體、社工及青年服務者等，轄下亦有四個工作小組，覆蓋範圍廣泛。佢又話，委員會三十名委員當中，約四成人都未夠三十五歲，而委員會亦設增選委員，約有二十至三十人，好多都係三十歲以下嘅後生仔，但即使年輕人佔大多數委員，都唔代表可以解決到時下嘅青年問題。
卓妮
| 人人做記者 爆料方法 : | 爆料熱線： | (852) 3600 3600 | 電 郵： | news@opg.com.hk | 網上爆料 |
| 傳 真： | (852) 3600 8800 | 手機網站： | m.on.cc | ||
| SMS： | (852) 6500 6500 | MMS： | ireport@on.cc |
