大輝捐錢側側膊 鄉紳不滿
有口痕友話，就算大輝入黨兼落戶新東，北區四鄉包括上水、粉嶺、打鼓嶺同沙頭角北區嘅票都唔會入大輝袋，事關鄉紳為咗一件舊事嬲到依家。
話說鄉議局早年為建新大樓四處撲水，富貴黨榮譽主席田北俊（田少）雖然唔係新界人，都二話不說拍心口捐錢，亦因此獲委任為鄉議局顧問，鄉紳們事後自然好開心咁喺選舉時為田少「抬轎」。相比之下，當年同樣有份被揼心口嘅大輝就側側膊，唔少鄉頭看在眼內自然唔開心。所以田少寄望將歷史重任交畀大輝，但係就算大輝應承，到時可否順利繼承田少嘅政治資源，都仲係未知之數。