渡海濠情:充闊佬 最強三大

「嫁個有錢人」相信係好多少女嘅夢想,有人美夢成真,但亦有人弄致焦頭爛額,就好似嚟自凱旋桑拿嘅莎莎,就曾經叫過幾次胡,但都食唔出,所以佢好想知道十二生肖中,邊個生肖嘅男生最喜歡扮嘢充闊佬?

第一位:猴男 扮鬼扮馬

師傅話屬猴嘅男士,天生就喜歡扮鬼扮馬,而且喜歡作弄人,如果佢哋知道女伴發夢都想認識有錢人嘅話,佢會因為出於貪玩或者存心作弄而扮成有錢人出現囡囡眼前,由於佢哋扮乜似乜,所以一定會輕鬆地打動身旁女伴。莎莎話:「我兩年前嘅男朋友就係屬猴嘅,佢從我啲朋友口中得知我想嫁有錢人,竟然扮富二代嚟追求我,因為佢又高大又靚仔,加上為咗追我仲好肯使錢,於是咪上當囉!但日子一久,床頭金盡,就知道自己上當啦!」

第二位:龍男 氣勢如虹

屬龍嘅男士本身氣場特別強大,就算只係打工仔都好易畀人以為佢係大老闆,所以有追求者係屬龍嘅,話畀你知佢喺某大公司做嘢或者自稱做生意,你真係要問清楚佢做乜嘢職位?或者做乜嘢生意?咪自以為是畀佢嘅外表呃咗!莎莎話:「我對上一任男朋友就係屬龍嘅,相識時我問佢做乜嘢?佢話喺銀行做金融投資,心諗佢係銀行嘅高層,於是咪瞓身討好佢囉!點知佢只係個見習助理,唔係要佢買樓準備結婚,都唔知道佢原來係空心老倌!」

第三位:蛇男 愛用詭計

屬蛇嘅男士為咗追求異性可以話無所不用其極,扮有錢人簡直係家常便飯,但屬蛇嘅演技又冇屬猴嘅朋友叻,亦冇屬龍嘅攝人氣勢,單靠把口討好賣乖,所以經常都會出現好多錯漏,囡囡們只要小心觀察,就不難發現到佢哋嘅破綻。莎莎話:「最近呢個男朋友就係屬蛇嘅,佢話自己係富二代,但演技又差,氣場又弱,最主要荷包又唔鬆動,出街食親都食平嘢,出第三次街就畀我發現到,即時就飛咗佢,所以呢三種男人真係要小心提防!」

本周大吉生肖

異性運:牛、羊、狗

桃花運:虎、龍、猴

和合運:馬、豬

莎莎Profile  

年齡:22歲

三圍:35-24-35

撰文:小德

攝影:阿俊

玄學提供:寶源師傅