十年樹木，百年樹人，一所學校成立逾一百年，培育不少社會精英。香港培正中學日前舉辦創校一百二十五周年紀念晚宴，政商界名人校友難得相聚，談談近況、細說往事，非常溫馨。香港足球總會主席梁孔德都係校友，佢話最懷念學校嘅午飯時間；而中央政策組特邀顧問陳光明就喺晚宴重遇當年嘅初戀情人。
一九六五年畢業嘅梁孔德，中一至中六都喺培正中學就讀。佢憶述，五十年前喺學校寄食，午膳每餐都要一元，有兩個餸可以選擇。如果有時啲同學睇到其中一款比較吸引，就會個個都排晒隊揀同一味餸，令佢印象深刻。不過，因為供應一般都足夠，所以又未至於要爭食咁誇張喎。
以前通訊唔係咁發達，畢業後要保持聯繫確實有難度。好似陳光明喺培正畢業後負笈海外，自此與同學失去聯絡。點知早前佢喺社交網站見到百仁基金副主席羅詠詩（Anthea）嘅丈夫黎藉冠（Michael）擔任香港培正同學會會長後，即刻託上託搵Michael幫手尋根，透過畢業年份搵到自己所屬嘅「禮社」，順利搵番當年一班同學仔。
咁啱今年係陳光明畢業二十五周年，晚宴當日早上佢仲重返校園接受銀禧加冕儀式，除咗遇到初戀情人外，又諗起細個時媽咪日日接佢去附近茶餐廳食晏，心情激動，百般滋味在心頭！至於畢業於真光女校嘅Anthea，佢同Michael並唔係喺聯校活動中認識，而係投身工作後透過朋友聚會認識，Michael日日等佢收工，最終用誠意抱得美人歸。
卓妮
| 人人做記者 爆料方法 : | 爆料熱線： | (852) 3600 3600 | 電 郵： | news@opg.com.hk | 網上爆料 |
| 傳 真： | (852) 3600 8800 | 手機網站： | m.on.cc | ||
| SMS： | (852) 6500 6500 | MMS： | ireport@on.cc |
