佔領死唔斷氣，旺角呢頭「重光」，嗰頭被烏合之眾以「鳩嗚」之名鬧事，有人揚言燒政總，有人聲稱喺警察總部及旺角警署放炸彈，有人警告要將行動升級，簡直無法無天。「東方報業民意調查」顯示，絕大部分受訪者直指佔領失控，司法、立法、行政三權瀕臨崩潰，香港將陷入難以管治嘅黑暗局面。
嗱，佔領鬧劇當初打着「愛與和平」嘅旗幟爭取真普選，呃到唔少人，可惜好快就暴露「恨與暴力」嘅真面目。睇吓旺角連日來要幾亂有幾亂就知喇，佔領者無視法庭禁制令，驅之不散，仲不斷對警方作出挑釁，成班爛仔咁款，搞到商戶被迫落閘，旺角變成生人勿近嘅鬼域，死唔死吖。
即係咁，佔領鬧劇搞到今時今日嘅失控局面，幕後黑手不甘失敗，垂死掙扎，固然係主因，但港府有法不依，畏首畏尾，唔通冇責任嘅咩？大家有眼見，當局處理佔領進退失據，一味採取拖字訣，講得好聽係打消耗戰，講得難聽係束手無策。最離譜嘅係，當局好似怕咗佔領人士咁，竟然由民間團體出面申請禁制令，而警方就匿喺禁制令背後「協助執法」，仲要係選擇性執法嗰隻，只去旺角清場，對佔領大本營金鐘及銅鑼灣就闊佬懶理，點止法律面前人人不平等吖，直頭區區不平等喇。
正如「東方報業民意調查」顯示，對於港府拖延清場，佔領者無視禁制令，四成一受訪者批評有法不依，助長違法歪風；兩成五直指政治鬥爭毀司法權威；一成九認為法治最後一道防線失守。講得好啱，法治係香港賴以成功嘅基石，家陣法治基石一朝喪，香港仲邊有前途吖！
講到香港無運行，真係多得班反對派政客唔少。佢哋一方面鼓吹違法有理歪論，將年輕人當炮灰，一方面喺議會大搞不合作運動，莫講話三堆一爐及公務員加薪通過無期，甚至關乎基層家庭福祉嘅低收入家庭津貼，一樣被束之高閣。呢，日前立法會扶貧委員會本來要討論婦女貧困問題，結果又因為法定人數不足而流會。反對派騎劫議會，犧牲市民利益，簡直天理不容吖。聽吓市民點講啦，三成五受訪者認為反對派公信力及民望破產；兩成四直斥必遭選民唾棄，為事件找數；兩成二預言搞事政客將在選舉失利，失去議席。
冇錯嘞，多行不義必自斃，佔領黑手及反對派政客狼狽為奸，搞到香港三權皆廢，市民睇得一清二楚。正所謂，避得過初一，避唔過十五，呢班人渣敗類就算逃得過法律，個天都會收佢哋喇！