風水嘅嘢，玄之又玄，有時真係唔到你唔信o架！呢，大家記唔記得上個月颱風「海鷗」襲港，吹斷豎立喺鴨脷洲洪聖古廟前、用嚟擋煞嘅「定海神針」，當時堪輿學家已警告，香港將會出現亂局，結果不幸而言中，佔領行動一發不可收拾，依家都唔知點收科，你都咪話唔邪。
正所謂，亡羊補牢，未為晚也。定海神針唔斷都斷咗，為今之計係拿拿臨諗吓點補鑊。有堪輿學家建議，如果復修需時，廟祝可以先做一支銅造嘅仿製品頂住檔先，只要高過旁邊嗰支，就可以擋煞。佢又警告，定海神針對香港安定有好大作用，如果唔盡快整番好，未來可能仲有排亂，唔係講玩o架。
冇錯喇，事關香港安危市民福祉，梗係寧可信其有啦。可惜，市民急當局唔急，神針倒塌後，街坊搵古蹟辦幫手，點知對方一味歎慢板，話正進行結構檢查，以便制訂合適維修方案，又話會以公開招標方式，委聘合資格承建商進行復修工程喎。
即係咁，港產官僚做嘢出名拖拖拉拉、甩甩漏漏，等佢哋研究完招標完，唔知又要拖幾耐。試諗吓，家陣香港七國咁亂，佔領鬧劇沒完沒了，經濟被破壞，民生受影響，連法治根基都搖搖欲墜，繼續拖落去，香港好快就玩完，到時有定海神針都救唔番喇。
唔係危言聳聽o架，雖然話玄學嘅嘢信不信由你，但有時靈起上嚟唔到你唔服。好似有「門常開」之稱嘅政府總部咁吖，犯咗「穿心煞」嘅風水大忌，啟用後果然頭頭碰着黑，港府固然撞板多過食飯，社會更係七國咁亂，家陣仲爆發佔領鬧劇添。所以話啫，三分人事七分天，凡事都係小心啲好。退一步講，即使港產官僚多數飲洋奶水長大，信天主多過信風水，但唔好唔記得喎，洪聖古廟係法定古蹟，當局本來就有責任保育，點可以闊佬懶理，關人個關o架。
講起保育，真係唔提猶自可，一提把幾火。港府年前將千幾幢建築物列為歷史建築，點知當中七成屬私人物業，結果引發極大爭議，有啲業主怕煩，索性將建築物一拆了之，保育變成毀育，港產官僚添煩添亂，旨意佢哋保育歷史遺產，真係蚊都瞓蛇都死喇。
唉，流水落花春去也。香港過去被視為福地，創下無數奇迹，點知回歸後風風雨雨，紛紛擾擾，簡直永無寧日。家陣定海神針仲斷埋，佔領鬧劇難以收科，唔通香港真係氣數已盡！