中西區區議會近日除咗受「佔中」影響搞到人人頭痕外，據知明年先舉行嘅區議會選舉亦提前開戰，其中許智峯、張國鈞（Horace）兩位分屬不同陣營嘅議會新丁都面對「對家」挑機；其中許智峯因為多次大鬧兼佔領區議會而觸發民意危機，據知建制派已經至少有兩人劍指許智峯個位，誓要踢走佢。
瞄準許智峯個位嘅，據了解係一個本身任職牙醫嘅地區人士劉尉欣，佢近兩、三個月忽然高調，繼早前加入中區街坊福利會提供服務外，後獲民政事務總署委任為中環及半山分區委員。雖然佢報稱獨立，但同時加入區內多個親建制派社團。另一加入競爭嘅，就有傳係該區委任區議員文志華。
除咗許智峯，外號「企鵝男」嘅Horace喺一一年以二十四票之差險勝民主黨莊榮輝，據知西環選區受重建影響，新街坊以中產、外籍人士為主，加上莊榮輝敗陣後呢幾年冇停過地區工作，誓要重奪議席，所以Horace都要居安思危醒醒定先得喇。