政情：中環出更：馬場名人唔怕伊波拉
伊波拉死亡人數突破四千，病毒日前更蔓延至西班牙及美國等地，但卓妮前日在沙田馬場見到多位名人，佢哋就話唔驚喇。對於坊間有傳伊波拉最快會於三星期內傳到香港，馬會大董李家祥（Eric）就話，香港人經歷過○三年沙士一疫，市民衞生意識非常高，好似佢太太咁，就成日提醒佢同人握完手記得唔好摸眼耳口鼻。
Eric話，咁恐怖嘅沙士大家都經歷過，當年仲個個都驚空氣傳染而買晒一堆堆口罩，萬一伊波拉來到，大不了再去掃眼罩。
李家祥稱避無可避
佢又話，現時交通咁發達，每日咁多人坐飛機周圍去，就算真係殺到嚟都避無可避。但佢始終覺得香港嘅非洲人唔多，相反內地廣東省就有好多，所以要驚都唔係香港人驚先喎。
「家電大佬」德國寶集團董事長陳國民就話，市面上有好多電器都可以消毒衣物或食具，未覺得要買眼罩同保護衣。康泰旅行社董事長黃士心亦所見略同，原來佢以前都經常去撒哈拉沙漠等非洲地區公幹，好似依家咁嘅情況，唔去咪得囉。
講起「病毒」，國際黑客組織「匿名者」近日亦攻擊多個網站，被問到驚唔驚馬會網站成為黑客攻擊目標，Eric就話馬會網站每日都好多人瀏覽，所以佢哋長期都處於戒備狀況，對呢類活動當然非常警覺。
卓妮