政情：反佔中幾乎unfriend 周浩鼎與友修好
近日佔領中環行動令社會撕裂，網絡上嘅分化就更極端，社交網站更出現一輪「Unfriend」（移除朋友）潮，連青年時事評論員協會主席周浩鼎（Holden）疑受此困擾，喺社交網站自爆要「Friend番unfriend咗嘅朋友」！
支持同反對佔中嘅朋友最近時有激辯，本身反佔中嘅Holden喺社交網站話，當見到群情洶湧時，自己何嘗唔係充滿憤怒，仲彷彿一度想打人咁。不過身為教徒嘅Holden冷靜過後，認為既然雙方未能互相說服，應該先放低對錯，再學會愛有關反對者，呢個先可以解決問題。因此佢主動傳短訊畀嗌過交嘅朋友，好彩佢哋都好大方，大家已重修舊好嘞。
傳短訊問候
Holden其後接受查詢時，承認曾同個別朋友有爭執，但未去到要移除朋友嘅地步。佢又趁機畀啲貼士大家，話想同朋友重修舊好，與其再三重申立場，不如向對方送上簡單一句問候仲有效喎。