僭建物遍地開花 市民憂心
「呢區嘅僭建可以話係遍地開花，我夠膽講，樓齡過三十年嘅建築物大部分都有僭建！」筲箕灣居民何先生指區內僭建日益嚴重，近日又發現南安街有大廈平台僭建，擔心影響樓宇結構安全，「你可以話我杞人憂天，但如果跌隻窗落街，到時就唔係講玩。」
屋宇署發言人證實，經派員視察後，發現涉事大廈平台有僭建物，將按序向業主發出清拆令，並已發信通知，要求盡早自行清拆。
促當局檢討執法準則
何先生對屋宇署執法效率大感不滿，要求日後加強巡查，以防患未然，同時建議當局反思執法準則，「如果係有危險嘅，就應該拿拿臨取締，唔係叫人自己拆就算；相反，如果檢查過係唔影響結構，就可以考慮吓係咪畀人入紙申請作為一個合法建築物，咁就係一個雙贏嘅解決方法。」