- on.cc 東方互動主頁
- 5月12日 (一)
曾經先後出任過食物及衞生局副局長和特首辦主任嘅梁卓偉（Gabriel），去年八月成為香港大學醫學院近百年來最年輕嘅院長後，大家都對年紀輕輕就涉足官場嘅佢寄予厚望，工作忙碌自然係意料中事，但估唔到佢連購物都比其他人匆忙。有日下午四點幾鐘，Gabriel難得忙裏偷閒，現身中環太子大廈三樓一間嬰兒服裝店購物，好快手就買到嘢，然後急急腳趕住離開。
卓妮上前睇吓Gabriel買咩啦，發現原來佢係買BB衫。Gabriel話，佢有個契仔就嚟生日，目前未夠一歲，所以就諗住買份生日禮物送畀契仔喎。佢一向對衣着打扮都好有要求，揀衫當然難唔到佢啦！見佢前後揀咗約十五分鐘，就睇中咗一件嬰兒恤衫及一條褲仔，然後直接行埋櫃位碌卡畀錢。不過，唔知佢係咪仲有工作在身，見佢冇即刻拎走啲BB衫，等職員包裝好再暫時寄存在店內。
Gabriel離開時，邊行路邊低頭回覆短訊，睇嚟院長嘅工作真係忙到冇時停。
咁忙咪連世界盃賽事都睇唔到囉？Gabriel就透露，其實佢好想睇，但因為場場波都係深夜，佢真係冇辦法，如果休息唔夠又會影響工作，所以惟有放棄喇。至於有冇心水睇好邊個國家球隊，佢就好實際話以往都會睇往績來決定，但今年就真係唔得閒研究喇。
卓妮
| 人人做記者 爆料方法 : | 爆料熱線： | (852) 3600 3600 | 電 郵： | news@opg.com.hk | 網上爆料 |
| 傳 真： | (852) 3600 8800 | 手機網站： | m.on.cc | ||
| SMS： | (852) 6500 6500 | MMS： | ireport@on.cc |
