德國大炒葡萄牙

比比鹵莽見紅
德國4:0葡萄牙（Getty Images圖片）

德國總理默克爾都有入場撐祖國，主帥勒夫依然用無鋒陣，派出馬里奧葛斯於前線「裝假9」，而葡萄牙「萬人迷」C朗則趕及傷愈復出。開賽後12分鐘，馬里奧葛斯殺入禁區遭荷奧彭利拿剷跌，葡軍被罰12碼，湯馬士梅拿操刀一針見血，為「日耳曼兵團」先拔頭籌，32分鐘中堅曉姆斯接應卻奧斯的角球頂成2比0。最慘是葡萄牙中堅比比及後唔生性，先用手打中湯馬士梅拿塊面，之後更用頭撼後者，球證見狀直接出示紅牌將他趕出場，完半場前湯馬士梅拿左腳快射再建一功，個人梅開二度，送夠葡萄牙三蛋返入更衣室。

C朗冇料到

易邊後C朗及葡萄牙的表現無起色，德國得勢不饒人，51分鐘奧斯爾單刀左腳一趟被魯爾柏迪奧斯救出，78分鐘上屆以五球榮膺神射手的湯馬士梅拿門前執死雞成4比0，成為今屆首位連中三元的球員，慶祝德軍於第100場世盃決賽周賽事的第61場勝仗，亦延續「幸運女神」默克爾入場撐德軍未輸過的紀錄。

比比摑完湯馬士梅拿再送「頭槌」，難逃領紅牌命運。（Getty Images圖片）	C朗（右）傷愈在今屆世界盃首次上陣，可惜葡軍大敗而回。（Getty Images圖片）	現場觀戰的德國總理默克爾，看到球隊大勝高興不已。（Getty Images圖片）

本報綜合報道