水務署塞責 爆喉拖半年
政府高官近日頻頻開腔呼籲市民「慳水」，語音未落，水務署再被揭帶頭「嘥水」！粉嶺孔嶺村去年十月被發現有食水喉管爆裂，維修竟拖足半年。村民不滿食水被白白浪費，更擔心喉管會進一步爆裂造成更大影響。儘管持續滲水不斷，當局仍未予正視，直至本報轉介後始派員維修。立法會議員批評水務署維修緩慢，帶頭浪費食水，要求檢討。
「咁樣漏法，漏一個鐘嘅水都夠我哋全村用一日！啲東江水咁貴買番嚟就係咁嘥晒！」鄧先生與記者視察，發現村內兩個地方疑有食水滲漏，有建於水錶前的露天喉管持續噴水，在數百米外的另一處，有地下去水槽湧現大量清水。
「之前噴到個窗濕晒」
鄧指水務署早前派員視察時已承認露天喉管的維修責任，卻一直未予維修，家居位於爆裂喉管旁的雷太則擔心水管進一步爆裂，噴出的食水可能濺濕屋內家具，「以前隔籬條食水喉都試過爆，噴到我成個窗都濕晒！依家呢條喉咁漏法，一日唔整、我一日都好擔心！」
與此同時，鄧又指村內有地下去水槽亦有滲漏情況，水務署派員化驗後曾承認涉事位置有食水湧出，但懷疑滲漏水管屬私人擁有，故未予處理，「雖然係私人喉管，但滲水個位仲未過水錶，冇人要畀錢又點會有人理，停咗佢哋啲水就會有人理喇。」鄧指受影響村民發現滲漏致水壓下降後，已另建新喉管，並申請從其他位置接駁食水，顯示滲水問題最終或無人處理。
水務署發言人承認，早於去年十月已接獲市民反映，指上址有露天喉管滲水，惟喉管處私人鐵閘內，當局需時確認喉管誰屬。另外，狹窄的圍牆夾縫位置亦導致施工困難，令維修延至早前才告完成。發言人又稱，地下去水槽的滲水問題源於有關露天喉管，已一併修妥。
「你哋嚟影完相，水務署啲人就即刻嚟整番條露天條喉！但係地底去水槽個位仲漏緊水，都冇人理過。」鄧反駁當局只修妥其中一個滲水位置，而非全面解決問題。
對於村民的反駁，水務署發言人補充指，涉事地點有大量私人喉管、且網絡複雜，該署經數次測試仍未能成功確定滲漏位置，將繼續協助相關人士測試及檢查，以盡快找出問題水管。
議員轟立壞榜樣
立法會環境事務委員會委員范國威批評水務署跟進消極，既浪費公帑亦浪費水資源，認為半年維修時間屬「不可接受」，「水務署一邊叫人慳水，一邊就不斷嘥水，真係好壞嘅榜樣！」范促當局檢討處理程序，確保維修時間合理。
記者：林松澧、楊育輝