政情：公民講場：削減個人遊 驚「方」跌落地

特首梁振英在前日策略發展委員會閉門會議上，提出削減兩成內地個人遊旅客建議「試水溫」，點知消息傳出後令各界議論紛紛。當中最大反應就係立法會批發及零售界議員方剛，佢話一聽到特首提出減兩成個人遊旅客時，「差啲跌咗落地囉、非常驚訝」，話擔心會影響香港經濟，特別係零售市場，所以建議政府將「一簽多行」改為「一簽一行」，因為唔過夜嘅旅客影響輕微啲喎。方剛對零售業界咁上心，業界真係要送個軟墊畀佢，萬一佢跌落地都有嘢墊住嘛！