政情：廣東社團總會 風波中換屆

總會好罕有咁即時發出新聞稿公告天下，並指推選「林光如及梁亮勝等人為常務副主席」，特別凸顯咗資深副主席林光如嘅名，唔通係為咗平衡會中人士對「飛來蜢」爭位嘅不滿？

副主席位「膨脹」

可靠消息人士話，常務副主席係今次新設嘅職位，除咗林光如及梁亮勝之外，其實仲有十幾個咁多，至於副主席亦有幾十個，淨係常務及一般副主席加加埋埋就接近五十個，認真誇張。即將落莊嘅呢一屆副主席都只係廿三個，可見新一屆嘅副主席位多咗好多。新一屆班子將於七月一日接棒，任期至一七年六月底。