政情：名廚後人推動飲食革命

力求天然 下周五「起義」

提倡天然健康飲食嘅Jamie Oliver，近年喺全球發起「為食起革命」，包括訂出下周五（五月十六日）做「為食革命日」，發動不同國家及城市嘅識食人士，喺當日一齊製作同一味菜色「彩虹沙律卷」，佢喺香港嘅合作組織，就係Beatrice創辦嘅go.asia。Beatrice尋日就喺一個商場內，向香港志同道合者公開示範點做呢道菜。

Beatrice指出，城市人日常享用嘅食物，好多都係經過人為加工，例如成份根本冇橙嘅橙味汽水、冇檸檬嘅檸檬味蛋糕等，呢啲食品嘅色香味全靠化學調教而來，經常食用對身體肯定有不良影響，現代人唔少病痛可能都係因此而來，呼籲港人為咗自己健康着想，喺飲食上必須懂得選擇。