社民連「長毛」梁國雄早前喺立法會向財政司司長曾俊華（鬍鬚曾）掟陰司紙，鬍鬚曾即場以「行開啦」回敬對方，之後仲寫網誌暗示自己隨時會向長毛爆粗。唔知係咪因為立法會預算案拉布戰提早流會收場，鬍鬚曾得閒得滯，尋日佢又寫網誌炮轟班泛民議員，今次寫寫吓仲踩過界講埋唔屬於佢政策範疇嘅政改，不點名狠批部分民意代表立場極端，擺明係拉倒政改，擔心政改原地踏步會令社會不穩喎。
鬍鬚曾喺尋日發表嘅最新網誌主動提及政改之爭，不點名炮轟部分泛民立場極端、寸步不讓，唔似係想討價還價咁簡單，而係根本想拉倒政改。佢又以受其害嘅預算案拉布戰為佐證，形容香港依家嘅政治現實，就係少數極端聲音緊緊拉住其他議員後腿，令理應着重理據嘅政改討論，如今也出現大量不着邊際嘅爭議。
有份發動拉布嘅長毛反駁，港府堅拒落實全民退休保障，佢先至以拉布作回應，鬍鬚曾反指有人寸步不讓，應自覺「面紅」。不過話說回來，鬍鬚曾敢於就政改表態狠批泛民，更加凸顯出真正負責領軍推銷政改嘅高官軟弱同冇「吉士」。