公民講場：議會胡鬧兩「國」互轟

激進泛民主派就財政預算案「拉布」，年復年再次發生，尋日開始「拉布」冇幾耐，就因為會議廳法定人數不足而流會，劇本同往年一樣，只係流會時間提早咗啫。建制派受「拉布」困擾，議員王國興就帶埋把道具金鉸剪出席會議，希望主席快啲「剪布」。不過，王國興尋日開會期間亦走咗出去飲奶茶，仲喺響鐘點人數最後一分鐘先至返回會議廳，結果被梁國雄屈佢係導致流會嘅元兇。雖然泛民同建制互指對方不是，但其實兩邊都一樣係衰喇！