外號「民主阿婆」嘅前政務司司長陳方安生，早前聯同「李漢奸」民主黨創黨主席李柱銘，攜手出訪美加「唱衰香港」，被內地官方媒體直斥佢「賣國求榮」。
陳太尋日出席科大一個政改論壇時，有學者指其實香港已具備實行民主普選嘅所有條件，但由於中央對香港缺乏信任，因而要對特首普選重重設限。期間有台下人士直指陳太同李漢奸早前訪美，正正令中央更難放心畀香港實行民主，質疑陳太係咪幫緊CIA（美國中央情報局）工作。
面對咁嚴重嘅指控，陳太居然都冇直接否認，只係話自己係咪中情局人員，交畀港人智慧定奪。佢仲自言做人向來忠於自己，冇人逼到佢做任何佢唔想做嘅嘢喎。言下之意，陳太即係自願賣國幫CIA打工喇？
陳太又話，特首梁振英日前先喺香港接見美國國會議員、有建制派政黨亦曾率團外訪並與當地政要會面，但就唔見有人質疑港府同建制派勾結外國勢力。梗係喇，人哋見啲老外係為咗唱好香港，幫香港吸引多啲外資同尋找發展機遇，陳太同李漢奸次次外訪都旨在「唱衰香港」，幫港人倒米，咁有智慧嘅香港人梗係有唔同評價喇！