近期議題瓣瓣中招
民記中委會去年決定反對擴建將軍澳堆填區，但該黨議員今年又喺立法會環境事務委員會對擴建撥款投下贊成票。日前環境局局長黃錦星到屯門區議會推銷「三堆一爐」時，民記嘅區議員又圍攻政府，並集體拉隊離場引發流會，表面睇以為民記反對，但就有人質疑佢哋實情係要避免表態。
除此之外，早前港府公布高鐵工程將延誤一年，就有大專生到民記總部抗議，聲討佢哋當年支持興建，先有呢個「大白象」工程出現。
另外，上星期民記提出政改意見，建議特首參選人要得到提名委員會過半數人支持先可出閘，但就被泛民抨擊門檻太高，連政府高官都話方案難凝聚共識，認真行衰運。