政情:「六四紀念館」遲遲未裝修

支聯會去年斥資九百七十六萬元購入尖沙咀一個商廈單位,作為永久「六四紀念館」,期望喺今年四月、即六四事件二十五周年前正式開館。不過,據聞支聯會中人近期好煩惱,皆因佢哋搞咗好耐都仲未搞掂裝修等細節。依家距離原訂開館日期得番約一個月,如果再咁拖落去,六四紀念館分分鐘趕唔切喺六四之前啟用。

支聯會主席李卓人解釋,紀念館之所以遲遲未開始裝修,係因為喺設計階段用多咗幾個月。原來佢哋為咗萬無一失,特登搵咗兩間室內設計公司幫手繪畫圖則,希望可以從中揀個好啲嘅設計,點知最後就搞到用多咗時間。雖然係咁,阿人透露佢哋已經揀好設計公司同裝修公司,一個星期後將正式展開裝修工程,預計可以喺四月中完成。

不過,今次裝修只屬試驗性質,紀念館入伙後再慢慢「執漏」整番靚個展館。支聯會斥資近千萬元購入單位,依家又要攞成幾十萬元出來畀裝修費,所以除咗平時嘅籌款外,依家仲要主力向海外華人籌款,相信捐款暫時可以捱到紀念館開幕嘅。

第一手消息請下載on.cc東網iPhone/iPad/Android/Windows Phone Apps