貨車違泊 阻巴士上落客
李先生不時乘車途經德輔道西，發現常有貨車佔用巴士站上落貨，令巴士被迫於行車路上、落客，「霸住一條行車線落貨，搞到啲巴士埋唔到站，要喺第二條線度上客，前前後後就冇咗兩條線，其他車就喺後邊塞死晒！」李先生不滿警方長期無視問題，有礙道路暢通。
警方發言人表示，由去年十一月至今年一月已接獲三宗相關投訴，曾多次就問題進行針對交通違例行動，並發出五張定額罰款告票。發言人承諾將密切留意上址貨車違泊問題，並採取適當執法行動。
不過，李先生卻指，上址情況經投訴後雖曾一度有改善，但未幾即故態復萌，「其實個問題已經拖咗好多年，警方睇少一眼，啲貨車就當無事發生過，當正個巴士站係落貨區兼停車場！」李要求警方加強巡邏，透過嚴厲執法杜絕違規情況。