政情：廠商會選戰施榮懷露玄機
正值會董及會長改選年嘅中華廠商聯合會，尋日舉行傳媒新春午宴暨工展會答謝宴，會長施榮懷（Irons）、副會長兼展覽服務公司主席吳永嘉（Jimmy）及有意角逐下屆會長嘅副會長顏吳餘英都有出席。Irons喺影大合照時語帶玄機話，呢張相除咗佢同前會長黃友嘉之外，個個都有機會成為下屆會長。不過話時話，點解唔見已表態參選會長嘅副會長李秀恒在場？
顏吳餘英頻出鏡
尋日出席午宴嘅仲有楊志雄、吳宏斌及吳清煥三位副會長及幾位會董，唔係個個都同工展會有關，新春午宴先至係主題。自從廠商會會長之爭浮上枱面之後，顏太就好勤力出席大小場合，而Irons亦有意無意多次畀顏太曝光機會，令選情氣氛好詭異。
Irons話，今次係佢最後一次以會長身份與傳媒春茗，無論下屆係邊位接棒，希望外界繼續支持廠商會咁話。Jimmy就話，今年將喺重慶及哈爾濱舉行工展會，期望幫港商拓展內地市場。