政情：公民講場：印傭受虐案 卓永興好hea

印傭Erwiana涉嫌被僱主欠薪，仲要被虐打至重傷，直至僱主上個禮拜送佢返去印尼，先揭發呢單案件。港府嚴陣以待，多名局長都表明會嚴肅處理，仲即刻派員去印尼搜證，不過咁多個官員之中，搵極都唔見勞工處處長卓永興出嚟講番句公道說話，唔知佢係咪等住下個月中調任政務主任招聘委員會主席，所以連個心都調走埋呢？如果打工仔靠佢維護勞工權益，就真係自求多福喇。勞工及福利局局長張建宗尋日公布，除咗警方會派員調查外，亦「吩咐」勞工處派出勞工事務主任，要人吩咐至做，就知個處長幾咁放軟手腳啦。