政情：有相為證：愁眉苦臉 羅傑承冇運行
捲入澳門巨貪奇案嘅南華足球隊足主兼商人羅傑承，尋日同太太梁芷珊現身沙田馬場，滿臉愁容嘅佢唔止官非纏身，仲似乎嚇走咗財神，連愛駒「軍事出擊」都同主人一樣冇厘神氣，跑得個梗頸四。
愛駒跑梗頸四
羅傑承牽涉在內嘅澳門巨貪案經長達半年嘅審訊後，日前結案陳詞。佢尋日一早就去到馬場，不過未知係咪受官司影響，佢全日唧都唔笑，期間除咗同騎師喺沙圈傾咗一陣偈之外，幾乎都係冇表情。佢之後喺馬匹亮相圈嘅出入口見到記者，仲即刻掉轉頭，急急腳行上一層樓，去咗會員區域。咁樣避法，唔止記者，連幸運之神都搵佢唔到啦，難怪連佢隻馬「軍事出擊」都出擊失敗喇。