中環出更：頻頻搵外援 立會「打茅波」
第二十屆世界盃足球賽將會喺六月中假巴西十二個城市舉行，有團體尋日喺中環遮打道行人專用區舉行三人街頭足球比賽，仲邀請到知名球員山度士同小型足球總會會長霍啟山到場擔任主禮嘉賓。立法會足隊隊長陳克勤、體文界議員馬逢國同鍾樹根三位議員都有去支持，不過佢哋就企埋一邊無落場一顯身手，淨係喺比賽開始前負責主持開球禮。
本港球壇近來出現疑似打假波事件，陳克勤講笑話，立法會議員從來都唔會打假波，只會成日「打茅波」，搵來多位甲組外援球員幫手入波，令立法會足球隊得以維持多場不敗紀錄。對於立法會開會周不時有議員拉布拖時間，陳克勤話足球隊隊員踢波時唔會拖時間，反而不斷向前衝爭入球。足球隊隊員之一嘅馬逢國以為尋日有得落場，不過最後都係要企埋一邊無得踢。
細個食「波餅」 樹根留陰影
議員鍾樹根平日經常揸住相機做「龍友」，唔似鍾意玩體育活動，佢話自己原本都幾鍾意踢足球，不過自從喺小學六年班一次比賽中慘食「波餅」後，佢即時出現心理陰影，嚇到以後都唔敢再踢波。鍾樹根喺中學年代改玩籃球，不過佢話依家連籃球都放棄埋，因為好難搵夠人一齊打籃球。
霍啟山都話自己熱愛體育活動，每星期至少會約朋友踢一次波，閒時又會打吓壁球，保持健康體魄。啟山嘅哥哥、香港青年聯會主席霍啟剛十二歲起飄洋過海去英國留學，早前同啲青年呻話畀父母「賣豬仔」。細啟剛四年嘅啟山原來都有份去留學，但唔覺咁慘，佢仲成日約埋啲外國人朋友去睇英超賽事，仲慢慢就培養咗對足球嘅興趣添。
卓妮