侯活大手筆名錶贈隊友
杜域侯活（Dwight Howard）豪氣送禮，靚錶人人有份！火箭隊友拆禮物日收到「超人」禮物，唔係勞力士，就係Audemars Piguet，個個笑逐顏開放晒相上twitter，杜域侯活呢招夠晒振奮軍心，錢唔係最重要，其實以佢2,000萬美金（約1.55億港元）年薪嚟講，散紙嚟啫，最緊要係對隊友有心，團結一致就會有好成績。
火箭隊友收到「超人」禮物，紛紛放上twitter威威，占士夏登收到隻金色愛彼錶，至於柏臣斯（Chandler Parsons）就收到隻勞力士Datejust「金銀膶」，呢隻「勞」現時港紙賣緊近八萬，計計條數，杜域侯活今次「聖誕送大禮」應該使咗過百萬港紙，不過，「超人」年薪咁高，唔會同隊友計較嘅。
柏臣斯剷青鼓勵癌病童
「超人」對隊友窩心，而有「籃壇Justin Bieber」外號的柏臣斯就夠好心，呢名出名靚仔嘅火箭球星昨日懶理形象決定剷青。據《休斯敦紀事報》透露，柏臣斯早前探訪過1位患上末期癌病的10歲小球迷迪卡利，雖然迪卡利無懼死亡，但就因接受化療導致甩頭髮而鬱鬱不歡。柏臣斯稱：「迪卡利擔心冇晒頭髮會同佢個孖生兄弟唔似樣，身為迪卡利偶像，我決定剷青扮番佢，希望畀個驚喜迪卡利，支持同鼓勵吓呢位抗癌勇士。」柏臣斯為鼓勵病童犧牲一頭潮爆髮型，好心有好報，明早主場恭候灰熊，肯定打得更起勁！
（now635周五早上9時直播）