政情：今日你上鏡：霍麗萍話做爭產和事老

已故前全國政協副主席霍英東家族爆發第二輪爭產案，相信霍家兄弟姊妹心情都唔多輕鬆。早前有日下午大約兩點鐘，我哋遇見霍家大小姐霍麗萍（Pat）拎住大大疊文件同手袋，出現喺中環ifc商場，佢急步行落的士站等車，面色凝重，我哋上前同佢傾偈，佢先至展現笑容。講起爭產官司會唔會和解，佢話應該會，仲話自己可以做和事老，始終大家都係兄弟姊妹咁話。話時話，今次阿Pat都加入原告行列，同細佬霍震宇同一陣營，狀告多名家族成員，唔知佢點樣抽離做和事老呢？