跳至主要內容​跳至主目錄​

政情:中環出更:楊立門要出埋德成份糧

港府尋日喺屯門舉行最後一場地方行政高峰會專題論壇,討論各區大廈管理及維修問題,發展局局長陳茂波、民政事務局局長曾德成、民政事務總署署長陳甘美華等都有出席,而特首梁振英將會出席本月廿一日嘅壓軸論壇。尋日主場嘅曾德成問乜都唔識答,有部分題目佢仲要求常秘楊立門代答。

有屯門區議員呻,大廈法團同居民最大衝突之一係養狗問題,區內唔少居民投訴經常受到狗吠聲困擾,於是就叫曾德成教吓佢點做。曾德成聽到後好老實咁答:「養狗嘅問題我真係唔識答。」佢跟手無厘頭話有啲屋苑寫明唔畀養狗,之後就更加轉咗去答另一條問題,完全係答非所問。

元朗區議員郭強話,有位女議員喺環境改善委員會內聲淚俱下爭取喺區內興建隔音屏障,但環保署就話因為政策所限,唔可以喺佢指定嘅地方興建隔音屏障。唔知係咪聽伊人落淚分外憐惜,曾德成即時要求對方將更多資料交畀局方,又問起隔音屏障要幾多錢,承諾會將意見交畀有關部門處理。

卓妮

第一手消息請下載on.cc東網iPhone/iPad/Android/Windows Phone Apps

人人做記者
爆料方法 :
爆料熱線: (852) 3600 3600電 郵: news@opg.com.hk網上爆料
傳 真: (852) 3600 8800手機網站: m.on.cc
SMS: (852) 6500 6500MMS: ireport@on.cc
本網站已採納無障礙網頁設計。如閣下對此網站在使用上有任何查詢或意見,請以下列方式聯絡我們。 電郵 : enquiry@on.cc
東方日報香港人的報紙 必然首選 連續49年銷量第一