政情：中環出更：李文斌夫婦慈善騷顯唱功
保良局日前舉行一場慈善音樂會，為關懷特殊兒童捐助計劃籌款，一眾董事局成員紛紛大開金口獻唱。主席鄭錦鐘女兒鄭泳妮（Vene）「代父出征」初試啼聲，擔任籌委會主席嘅總理李何芷韻（Amanda）同老公理文造紙執行董事李文斌（Edmond）亦各唱一首金曲。估唔到平日斯斯文文嘅Edmond夫婦，一上到台竟然變身歌王歌后，超水準演唱令台下掌聲如雷。
Edmond話，佢同太太本身都好鍾意唱歌，兩公婆有時仲會喺屋企唱K，訓練有素，難怪踏上台板定過台油。卓妮問佢哋點解唔合唱一曲？Amanda就話：「唱兩首，可以籌多啲錢嘛！」認真識做。另一位籌委會主席蔡李惠莉則有老公「玩具大王」蔡志明、千金蔡加敏及公子蔡加讚現身撐場。
保良音樂會 總理開金口
曾經跳過芭蕾舞籌款嘅Vene唔單止唱得、跳得，仲好彈得，十多歲已考獲鋼琴八級。佢大爆屋企有部「家傳之琴」，話說佢兒時舉家移民新西蘭，家中鋼琴亦一併「移民」，後來一家回流返港，又將鋼琴運返屋企，依家就送咗畀姪仔彈，佢笑言，希望個琴可以代代相傳喎。
Vene透露，近日創立一個購物網站，專為失意人送上窩心小禮物，希望為佢哋雪中送炭。當晚獻唱嘅仲有總理吳帶基、紀寬樂同黃偉傑，三人模仿「Beyond」高唱名曲《海闊天空》，全場氣氛高漲。
卓妮