政情：許曉暉請纓做「社企代言人」
社會企業文化漸成一股旋風，有社企日前發起「十一良心消費月」，民政事務局副局長許曉暉（Florence）都請纓做「代言人」，日前出席一個青委午餐演講會時，不忘攞出一本社企指南出來硬銷吓。Florence仲帶頭喺社企買朱古力、曲奇、茶包大派街坊，提早做聖誕老人。
稱食飯買嘢首選地
Florence向來好撐社企，為響應號召，更加使得豪。近年佢每逢約朋友食飯，都係首選社企餐廳，最高記錄一日兩餐都幫襯社企。數近期至愛，係位於灣仔嘅韓國料理，冷麵夠晒正斗。除咗食之外，佢連買禮物都唔揀行百貨公司，轉攻社企。
近期Florence發現一批由新生精神康復會夥拍藝術家又一山人製作嘅紅白藍飾物，設計勁有型，一口氣掃入成疊八達通卡套送畀朋友，估唔到大受歡迎。不過，如果只幫襯一間，又太偏心，Florence轉頭掃埋社企出品嘅軟滑朱古力，仲有精緻茶包。使咗幾多就話唔講喇，但佢話最緊要幫到人喎。