政情：愛港力踩場 「龍獅旗」不舉
愛護香港力量（愛港力）繼上月底到立法會議員范國威辦事處示威後，尋日又拉大隊到同屬「香港本土」成員毛孟靜（阿毛）嘅何文田議員辦事處踩場，力數阿毛「經典十宗罪」，包括反對阿毛高呼「拒絕大陸化」、「源頭減人」等撕裂社會嘅口號，又狠批阿毛嚴人寬己拒拆僭建，仲鬧埋阿毛所屬政黨濫興訴訟全力反中等行為。
毛孟靜「十罪」 聲討勢眾
示威者其後又高呼「毛孟靜，日反夜反無時停」等諷刺口號，狠批阿毛「大半生依靠排內媚外、反中亂港搵食」，直指要阿毛痛改前非機會近乎零，然後將象徵「下台啦」的「Dislike」貼紙貼喺印有阿毛個樣嘅橫額上表達強烈不滿，隨後仲喺附近派單張力數其罪狀。
雖然被聲討主角阿毛全程唔喺現場，但期間愛港力一度與在場圍觀市民互相指罵，需在場警員調停。另外，其後又有幾名手持龍獅旗嘅年輕人聞風而至，疑向愛港力成員挑機，但未知係咪怯於愛港力人多勢眾，未及展示手上龍獅旗就急急收隊，落荒而逃。