政情：梁福元帶頭「鏟」除霸地王
元朗十八鄉石塘村過去不斷傳出有人非法霸地兼收取過路費，令村民忍無可忍。元朗十八鄉鄉事委員會主席梁福元尋日就聯同民政事務處職員同警方齊齊落村，視察多個被霸地王掠奪嘅地段後，就叫村民搜集所有可證明自己擁有地權嘅文件，經政府核實後，佢就會搵啲鏟泥車嚟將所有非法嘅房屋、鐵欄夷為平地。記得梁福元家族經營嘅元朗荔枝山莊去年都被指霸地，如今佢聯同警方剷除霸地王，實在令人感到意外。
斥非法建屋設閘收過路費
梁福元尋日一早就去到石塘村，了解近百名受影響村民嘅意見，又促請警方調查，可算係警民合作。據村民余女士所講，當地有位並非該村村民姓鍾嘅霸地王，經常喺條村內蝦蝦霸霸，唔單止霸屋、封地，仲夠膽將村民空置嘅村屋拆卸再建屋收租，又喺村口多個位置設閘門，向村民收取過路費，每架車每月收二萬元，至於村民就每位五百元。由於村民不肯就範，霸地王就索性封埋個出入口。
籲受害村民搜集地權證明
據聞呢位霸地王仲向村內一間寺廟住持收咗二十幾萬元，話可保寺廟三十年「平安」喎，點知三年後又再要收錢，住持忍無可忍之下向警方舉報及提供資料，最近警方就將呢位霸地王拘捕。梁福元視察過該村之後，就逐一記低苦主嘅聯絡資料，呼籲受害村民先搜集證據，包括搵地政總署幫忙及攞出地契等，證明自己擁有該地地權，繼而同政府相關部門協商。梁福元仲拍心口話，佢會準備好鏟泥車，隨時候命將所有非法嘅房屋、閘門及鐵欄夷為平地。
村民聽到呢個消息，梗係拍爛手掌啦，仲大叫梁主席好嘢，唔知情嘅仲以為喺度拍緊戲。其實，梁福元去年都曾被審計署批評，話佢家族打理嘅「荔枝山莊」涉及霸佔官地。直至今年初，有報道話佢同警方、規劃署、地政總署官員會面，探討涉及有人霸佔寮屋嘅問題，尋日又再咁積極搵警方幫忙，似乎佢好似吸取之前嘅教訓咁喎！