中環出更：忽撐同志 周一鑊遊行快閃
尋日有多個團體發起遊行，爭取同志平權及反歧視，擔任食物及衞生局局長時鮮有關注同志問題嘅平等機會委員會主席周一嶽（周一鑊）都有參加遊行，仲響應大會呼籲，着咗件紅色衫添！不過，周一鑊表面上講到自己好似好撐同志咁，但似乎講就天下無敵，行起上嚟就雙腳無力，皆因個遊行原本係由維園行去金鐘政府總部，但周一鑊行到銅鑼灣崇光百貨就以有事為由離隊快閃。
維園行到崇光已離隊
同志遊行尋日下午三點鐘喺維園出發，周一鑊到場後就同傳媒講，自稱今次遊行唔係代表政府，而係代表成個社會喎，而佢嘅任命就代表唔可以歧視任何人嘅價值觀，希望政府官員聽到同志嘅聲音。佢又話，平機會嘅立場係希望可以有一個討論空間，訂立適當嘅法律去保障同志，佢仲叫香港人唔好戴任何有色眼鏡看待同志添。
周一鑊以前做局長時又唔見佢撐同志，依家又懶係關注同志咁，可惜佢對腳出賣自己，行一小段就喺崇光快閃，拍得住當年「民主阿婆」陳方安生喺參加七．一遊行中途離場去恤髮，足以反映佢有幾咁撐啲同志，睇嚟都係抽水居多。
卓妮