水管長滲水 官僚遲處理
「漏水漏成幾個月都唔理，水務署又叫人珍惜用水，真係講一套做一套！」元朗輞井圍有食水管滲漏逾月，鄧先生認為不但浪費食水，更令地面濕滑，對途人構成危險。
水務署發言人承認，早在今年六月已得悉事件，至今已接獲四宗投訴。經派員調查後發現滲水部分屬一條設於水錶前的私人內部水管，指用戶須為其私人供水系統負上維修責任。當局已分別於七月及八月發信要求用戶維修，但至九月仍未見維修工程完成，遂於十月截水並將水錶拆除。
荒廢十年始移除
「原本用呢個水錶嗰間屋一早就拆咗，個水錶荒廢咗起碼十年，水務署搞咁耐到依家先嚟做嘢，有冇慢啲！」鄧先生續指，水務署派員移除水錶後，有關位置地面仍不時有小量滲水，希望當局盡快派員處理。