再鋒利嘅刀都有生銹嘅一日，好似已經五十七歲嘅立法會議員「長毛」梁國雄，日前就因為踢波勇戰受傷，導致左腳骨裂要留院六周治療。原來，當日長毛受傷後，工業界林大輝第一時間護送長毛入院，仲做埋保母，幫佢買牙刷、牙膏不特止，就連成人紙底褲都買埋，仲要係買大碼嗰隻，令長毛感受得到建制派人情味嘅一面。
原來當日係大輝隊波同其他球隊打友誼賽，大輝親自邀請長毛坐陣，所以長毛出事後，佢即刻護送長毛入院。雖然政見不同，但大輝呢個隊友都算唔話得，知道長毛要住院一段時間，於是即刻幫佢入貨買定各種生活用品，連紙底褲咁私密嘅嘢都幫長毛買，大輝真係夠晒體貼，大輝仲要一估就估中長毛着大碼，唔知佢用咩方法推測嘅呢？
究竟長毛點解受重傷，大輝事後分析話，除咗對手打茅波，另一主因當然係長毛「屎波」，唔能夠避開對手粗野攔截，所以佢勸長毛最好喺留院期間戒煙，如果身體狀態操fit啲，咁就無咁易受傷喇。話時話，長毛經常去示威衝擊保安防線，身手有乜理由咁渣呢？