中環出更：女狀元楊容容 任特首辦研究主任

獎學金回饋社會

雖然政府未有公布Rosy嘅個人履歷，但我哋明查暗訪後，發現Rosy同特首梁振英（CY）早有一面之緣，早在去年CY競選特首時，佢已經喺競選辦做義務工作，歷時兩、三個月。如果再喺網上翻查資料後發現，更發現佢喺學界一早聲名大噪，中學就讀聖保羅男女中學，及後畢業於英國牛津大學及美國普林斯頓大學，除咗兩文三語外，仲精通日語。

資料顯示，杭州出生嘅Rosy曾喺○五年以香港傑出學生身份，採訪時任商務及經濟發展局局長馬時亨，及至○八年考獲八優同兩科5*佳績，金榜提名成為當年女狀元，翌年仲取得尤德爵士基金獎。其後佢又回饋社會，將由細到大共二十萬元獎學金結集成立「楊容容獎學金」，協助家境貧困學生。

另外，發展局前政助何建宗尋日獲批准接受委任為清華大學訪問學者，為期一年，期間不受薪，負責審批嘅諮詢委員會認為何建宗遵從若干建議前提下，不會構成潛在利益衝突或引起負面公眾反應。

卓妮