政情：今日你上鏡：梁世華新卡片夠童真
月前退任中華廠商聯合會行政總裁嘅梁世華（Paul），日前現身一個活動，佢之前派過一張寫住「長者/退休人士」嘅卡片畀我哋，呢次又主動派多次新卡片，上面多咗三個Q版嘜頭，一款係着住高爾夫球衫，另一款就拎住塊乒乓波拍，反面就係行政裝束，展現晒佢活潑同嚴肅嘅一面，又幾Cute喎！
Paul話，商會一班兄弟姊妹早前同佢餞行時，特意搵咗個畫家畫咗兩幅人像送畀佢，佢見幅畫幾得意，索性買下版權，用嚟印卡片。Paul透露，退休後嘅呢三個月不停去旅行，去完東歐、韓國，嚟緊又會去英國，冇乜時間喺香港，所以老友同佢餞行嘅飯局都仲未食完。咁呢段期間有冇人主動邀請佢擔任公職？Paul坦言仲未有，短期內亦都唔會諗住，淨係想享受吓生活先。
佢話，下月將會回到母校北京清華大學做嘉賓演講，事關二十年前，佢曾以香港高級公務員研習班嘅第一團團長身份去過該校，至今仍擔任佢哋嘅歷史系顧問。