政情：政商囍事撞期好友頭痕
政商界近期喜事一浪接一浪，「紅色炸彈」一個接一個，首個高峰期係下月二日，據聞政商界至少有三宗喜事撞晒期，包括中港照相器材集團主席孫大倫嘅細仔、消費者委員會主席黃玉山嘅兒子結婚等。政商界中人對於喜事本來都畀面出席，但今次撞晒期就令佢哋好頭痕，大嘆個個都係好朋友，搞到分身乏術，因此對最後會喺邊個婚宴留到都係三緘其口。
繼商務及經濟發展局前局長馬時亨細女露玲日前出嫁後，政商界原來再隔一陣又喜事多多，其中下月二日更至少有三對政商界後代新人出爐，分別係孫大倫細仔同潮州商會會董林鎮洪女兒結婚、黃玉山兒子結婚等。有政界中人仲預告未來「紅色炸彈」接不停，未來兩個月至少要出席九個婚宴。
下月二日宜嫁娶勁搶手
我哋翻查農曆發現，下月二日的確宜嫁娶，至於點解三對新人揀埋同一日結婚，莫非係父母嘅傳統觀念要揀好日？孫大倫接受查詢時話，佢細仔今年三、四月期間決定同女朋友結婚，隨即向灣仔會展詢問有無場地擺設飲宴，發現基本上檔期都好滿，會展當時回覆有兩個日子，分別就係下月二日同十二月廿九日，所以講笑話呢個大日子係會展幫佢個細仔揀喎！
當問及三對新人撞晒期會否令政商界朋友分身乏術，孫大倫話，今次細仔會擺七十多圍，即有八百多名賓客出席，又感謝各位賓客朋友畀面出席，包括馬時亨、恒生銀行前大班柯清輝等都會出席。至於會否催促細仔快啲製造愛情結晶品，孫大倫話由於大仔本身已經有兩個囡囡，所以笑言細仔不用太趕，可以慢慢來。
呢三對新人嘅父母喜事當前固然笑逐顏開，但對於政商界中人嚟講，依家最猶豫唔係畀幾多人情，而係安排好當日飲宴嘅「路線圖、時間表」，事關三對新人擺酒地方，分別位於尖沙咀同灣仔，點樣先可以大方得體送上祝賀，避免得失任何一方，咁就要睇啲名人用咩辦法趕場喇！