中環出更：李家祥夫婦 觀賽戴VR形黑超

講起戴超，李太話佢哋之前去厄瓜多爾有「進化島」之稱的加拉帕戈斯，由於當地位於赤道，阿女李寶怡喺嗰度曬傷咗對眼，要即時去眼科醫院睇醫生，當時佢哋仲問過導遊，話附近原來周圍都冇偏光鏡太陽眼鏡賣，話拎過去一定好好賣喎。李太又話佢哋呢副正面同側面都係偏光鏡，去沙漠都唔怕，又方便揸車。李家祥就透露以前佢中學已經開始戴隱形眼鏡，方便做運動，不過後來覺得麻煩就戴番眼鏡嘞！阿女就笑阿爸好鍾意追新科技，屋企真係有VR，不過見阿爸其實都係鍾意玩手機遊戲多啲囉！

史立德戴太陽眼鏡遮皺紋

香港中華廠商聯合會副會長史立德亦不時戴太陽眼鏡現身，佢講笑咁話年紀大戴太陽眼鏡可以遮皺紋，睇落都後生啲喎。而佢呢日戴住嘅太陽眼鏡就係佢太太史顏景蓮幫佢揀嘅，有埋散光度數，去旅行或者戶外活動，一副就搞掂晒之餘，最重要係夠型吖嘛！好似佢之前同啲朋友去瑞士玩咗十幾日，淨係戴住太陽眼鏡影相都玩一餐，非常過癮。

轉頭見到信興集團主席兼行政總裁蒙德揚，提到早前有中學生因為參加通識比賽而發現市面出售嘅多款麥包全麥粉含量偏低，甚至只係染色麵包，平日好注重健康嘅蒙德揚就話好少特登選擇麥包，而佢食得最多就係阿女喺屋企用麵包機整嘅，一定食得安心啦！

史立德（左起）同老友陳國民、鍾志平及陳明耀，旅行時戴住黑超好型。（受訪者提供）

蒙德揚（右）話食阿女整嘅麵包最安心，旁為太太。

卓妮