大坑東球場鋪完又爛

大坑東遊樂場內設的三個草地足球場，平日的使用量極高。不過，郭先生月前已發現球場草皮「一忽忽」，經歷多時仍未有改善，「鋪完草皮冇耐，龍門前面又光禿禿！」中學體育科老師譚先生亦稱，相比其他草地球場，大坑東草地球場「爛地」的情況較為嚴重，「上年帶過學生嚟呢度比賽，發現啲草又少又短，似踢硬地多啲，學生着咗釘鞋踩硬地好容易會拗柴受傷！」

「呢個場啲草踢一、兩次就爛，康文署半年先鋪一次，踢到爛都未換到！」當區區議員韋海英指出，香港草地球場數目少，故大坑東草地球場租用率高、耗損亦快，「有啲草地場已經用咗仿真草、或者係靚啲嘅草，不過就算用靚草，如果唔識保養，使多多錢都冇用啦！」

韋海英	草地變泥地，儼如荒廢農田。

康文署發言人指，球場選用草種為大葉草，每日會作例行巡查、灑水等，每星期則有全面檢查及保養；每年夏季及冬季更會各自進行一次大型草地維修保養工作，包括翻土、平整地面、施肥灑水等。三個足球場分別於七月及九月中完成夏季草地保養工作，今個財政年度用於該處四個草地球場保養預算支出約九十萬元，當中不包括場地職員薪金開支。

球員於場邊開角球，大腳一抽即沙塵滾滾。	工人將草種運往足球場，準備開展保養工程。	波友點睇 吳先生：「政府口講推廣運動，但就唔肯投放資源，明知呢度多人用，都唔會做好啲！」
胡先生：「塊地唔平會好易仆親，個波又會四圍彈，其實想整靚個場有幾難？事在人為啫！」

大葉草唔係最好選擇

立法會民政事務委員會委員張國柱指出，康文署近年大力推廣全民運動，可惜運動場地及設施保養卻一直未盡完善，「一年（保養費）用九十萬保養四個球場係好唔夠，呢類保養工作仲要外判，顧問公司通常都會隔一排先去檢查，啲草踢鬆咗唔即刻處理好快就會變爛地！」

「淨係識得冇草就換草皮，大葉草唔係體育場地最好嘅選擇，只要保養得好，啲草會識生番，唔使下下換！」草地管理專家、中文大學生命科學學院名譽高級研究員兼香港園藝專業學會會長李賢祉博士認為，康文署缺乏管理球場相關專業知識，加上部門職員不時轉換崗位，難以管理得宜，「由香港大球場件事已睇得出康文署喺草地球場設計、管理都有問題，其他球場嘅情況就更加可想而知。」

記者：陳倩儀、黃芷君　攝影：阮佩君、詹海萍