上水鄉事委員會主席侯志強尋日凌晨上載咗幅相到社交網站，見佢手執劇毒無比、有「金腳帶」之稱嘅金環蛇，仲留言話呢條蛇長兩米，重達七、八斤，起初都唔知條蛇毒性咁高，無被咬親認真命大。雖然相中嘅侯志強着住粉紅色Ｔ恤，但攞住條蛇個樣都幾兇狠o架！佢話，條毒蛇尋日凌晨喺屋企花園出現，所以家人就叫醒佢去捉蛇，佢當時諗都冇諗，就捉住個蛇頭，仲話自小喺鄉村長大，所以無論乜嘢蛇蟲鼠蟻見到佢哋都要死喎。咁條毒蛇依家喺邊呢？佢話已經同圍村兄弟煲咗蛇湯飲，連蛇膽都吞埋，等買埋雞同龜板後，仲可以煮多味「蛇龜雞」添，好過食龜苓膏喎。正所謂「秋風起，三蛇肥」，侯志強認真識養生囉！