《蘋果日報》報道又被人批評不盡不實喇！該報趁近日港燈醞釀分拆上市，搵嚟一位港燈前工程師大談喺南丫島對開興建嘅離岸風場計劃，日前並刊出一篇「港燈前高層踢爆不環保，風電騙局掠港人十一億」為題嘅報道。不過，有知情人士透露，有關工程師事後睇到呢篇報道後，直斥部分報道內容失實，標題更加係斷章取義。據講呢位工程師已向港燈澄清，極之不滿該報同記者嘅處理手法，狠批該報將唔相關嘅說話加諸佢口中，對佢有欠公允，有關報道直情可以話係一個「騙局」。
知情人士又透露，該名退休工程師又踢爆有關訪問原來一早就做定，但竟然趁九月廿七號港燈分拆建議公布時，才擅自套用有關訪問作大幅報道，令市民錯誤解讀係回應分拆港燈嘅建議。據理解，事實上風場計劃會否展開，政府與電力公司仍在討價還價之中，雙方都需要按既有嘅管制協議機制辦事，所以話政府「明益」電力公司，幾乎可以話係錯判形勢，對於目前嘅政治氣候同民情毫無掌握。所以話，有關報道唔係不盡不實、斷章取義、譁眾取寵，咁又係咩呢？