政情：葉劉生日禮物全申報
議員利益申報同收禮再次成為公眾關注焦點，上周六牛一嘅新民黨主席葉劉淑儀最近都大受困擾。因為黨嘅一班同事為佢搞生日派對，好多黨友都送禮物同生日卡畀葉太，佢收禮物都收到手軟，但葉太認為近日公眾對收禮同款待有更高標準，所以穩陣起見，將會申報晒所有禮物。
下月偕囡囡遊地中海
葉太話，見到咁多人同自己慶祝生日，又收到咁多禮物實在好開心，但一諗要申報晒咁多份生日禮物就好頭痛，估計只係得阿女Cynthia嗰份禮物先唔會招人話柄。講起阿女，葉太下月初同阿囡放三星期大假，坐郵輪到歐洲地中海暢遊西班牙、意大利等國。葉太話生女着數啲，點都會陪阿媽喎。
我哋翻查過條例，原來行會成員收受超過二千蚊嘅禮物先要申報，而且如果喺特定節日如生日、結婚等場合收禮，都可以豁免申報。不過行政長官就唔同，需要申報超過四百蚊以上嘅禮物。葉太身為行會成員，但已用「特首」級數律己，認真唔話得囉。