政情：老嫩白鴿勢爆爭位戰

白鴿黨喺去年立法會選舉衰貪心，喺新界西派出李永達同佢老婆陳樹英分開兩張名單參選，喺新界東更加同時派出劉慧卿、黃成智同蔡耀昌三張名單參選，分薄晒自己票源，最後李永達夫婦雙雙落選，令該黨喺新西「捧蛋」一個議席都攞唔到，新東亦只得卿姐一人夠票出線，黃成智高票落選。事後唔少分析都指出，如果白鴿黨肯及早放棄蔡耀昌同李氏夫婦其中一人，應該可以喺兩區各贏多一席，勉強保住泛民龍頭大佬嘅地位，唔使好似依家咁淪為弱勢小黨。

去年食白果 新西竟加碼

不過，根據白鴿黨內部通過嘅疑似一六年立法會選舉八人名單，就顯示該黨未有吸取教訓，繼續高估自己實力。根據呢張名單，該黨將重點培訓「老鴿」陳樹英、「中鴿」葵青區議員尹兆堅同「乳鴿」元朗區議員鄺俊宇參選新西，意味「超老鴿」李永達已鐵定唔會再參選，但白鴿黨去年喺該區派出兩張名單都輸晒，今次仲想加碼派三隊參選，真係笑大人個口！

新東方面，名單顯示該黨有意派出中鴿蔡耀昌同做過廉政公署調查員嘅乳鴿林卓廷出選，好似比上屆收斂咗，但呢張名單並未計算角逐連任嘅議員，如果老鴿卿姐決定繼續選，佢哋三個遲早會喺新東互相逼死。

至於該黨嘅三隻南區乳鴿區諾軒、柴文瀚同羅健熙，前兩人會競逐喺港島區出選，後者就有意出戰超級區議會，不過如果黨內三隻老鴿單仲偕、何俊仁同涂謹申拒絕退休，呢三隻乳鴿就肯定點培訓都飛唔起。至於九龍東同九龍西，名單上就完全無人選，意味上屆首次當選立會議員嘅兩隻中鴿胡志偉同黃碧雲，喺黨內唔會有人競爭。