政府問責官員及行會成員接二連三出事及請辭，唔知佢哋辭職後最放唔低嘅係咩呢？曾任行政會議成員嘅香港黃金五十創辦人林奮強（Franklin）尋日就話，佢辭退行會後，呢一生最佩服自己嘅媽媽，而最耿耿於懷嘅係部分傳媒喺佢宣布辭職後，仍打電話畀佢現年八十幾歲，且患有阿茲海默症，亦即腦退化症嘅媽媽。
Franklin尋日接受一個網上平台訪問，除講起佢媽媽外，仲提到佢被指涉及「偷步賣樓」，以及向特首請辭嘅事。Franklin話，自己嘅唯一強項係做分析同研究，所以一心創立黃金五十來回饋社會。
至於被一份報章誣陷發表歧視新移民嘅言論，Franklin就話，佢冇歧視過任何人，呢件事令佢曾經感到委屈，但做人冇可能因為受咗啲委屈而乜都唔做。所以事情至今，佢話最想感謝家人嘅支持，而佢服務香港嘅決心，亦都唔會因為咁而有所動搖。