中環出更：四叔撐培華喜見生力軍
香港培華教育基金會成立卅多年，人稱「四叔」嘅恒基地產主席李兆基一直出錢出力，致力扶掖後進。培華昨舉行年度午餐會，卓妮有去趁熱鬧，原來仲有九名新成員加入，其中多人都係培華成員嘅第二代，好有薪火相傳意味。
尋日嘅午餐會，星光熠熠，四叔與長子李家傑聯袂出席，四叔致詞時首先提到培華最新發展，佢話培華過去資助、主辦同協辦教育項目共有五百八十八個，共培訓近七萬個領導人才，最近又聯同李兆基基金捐款，資助一千名中西部大學校長，到歐美著名大學實地考察，預計明年底會有超過五百名校長完成研修。
四叔其後又講到培華嘅組成，表示培華成員有八十多歲嘅，較年輕嘅亦有六、七十歲，急需補充新血，幸得今年有九名新成員加入，佢哋平均年齡只有三十多歲，個個都學識豐富，年輕有為。
九人中其中三個生力軍就係港區人大代表霍震寰三名子女，分別係霍思緯、霍啟中同霍啟文。其中靚女霍思緯依家有份設計珠寶首飾，正搵人設計介紹網頁，稍後亦會考慮搵地方開舖，不過佢承認依家地舖租金較貴，所以要小心考慮位置。另一名生力軍就係剛毅集團主席王敏剛嘅長子王浩存，王敏剛介紹兒子依家喺摩根士丹利工作，又爆料話之前曾搵過佢幫自己手，不過慘食「檸檬」喎。
方潤華贈記者養生秘笈
同場仲有協成行集團主席方潤華，協成行集團董事總經理方文雄同佢兒子方添輝三代同堂出席午宴。方潤華午宴前叫咗半杯檸樂飲，之後仲送咗一本《養生之道》畀卓妮睇吓，呢啲一直係佢精力充沛嘅養生秘訣，卓妮一定細讀。
卓妮