ＣＹ上台才一年多，不見「適度有為」，但見風雨飄搖，一個發展局，有上任僅十二天的發展局局長麥齊光，因涉嫌詐騙租津被廉署拘捕，為梁班子流下第一滴血！
好喇，接任嘅陳茅波，又劏房又醉駕又囤地，連環醜聞，連立法會主席曾鈺成都拋個「塔斯佗陷阱」出來，暗指政府管治威信已蕩然無存，失信於民，根本就難以再有效管治，實際上政府一年多來上演的就是「政策推出一項跪低一項」；講真，陳茅波因一個大話冚一個大話，其「擠牙膏」式的獨白，根本就蒼白無力，其「家人」、「朋友」關係一塌糊塗，自己都搞唔清，試問市民又點分得清其「太太及家人」——原來就係佢嘅仔陳天行！
陳茅波一味堅持「要為港人服務」，而發展局政治助理何建宗又因捲入囤地醜聞，於二十四小時內道歉兼閃電下台，比起茅波叔，何建宗可謂爽快得多！
有道是「人夾人緣」，ＣＹ與茅波叔特別投契，佢死都堅持茅波已「按制度申報」，與何建宗唔同；佢出席一個青年論壇，又語帶雙關話：「正如我哋今日做事一樣，往往提出一啲主張出來時，社會上總有啲消極的人。」
一個管治班子先天不足，後天失調，政府施政倒行逆施，敵友不辨，令原先支持者紛紛倒戈相向；到了如斯田地，依然不知反躬自省，反怪「社會上總有啲消極的人」，老朽只能贈佢一句「無知者無畏」！
事實上，政府整個管治班子就如清末大學者王闓運在其國史館上面寫的一副對聯，上聯：民猶是也，國猶是也，何分南北？下聯：總而言之，統而言之，不是東西。ＣＹ愛向「積極」方面想，不過，如果為了追求無畏而甘願無知，自我感覺良好，以為蠻幹一場就可以得到整個世界，老朽祝福佢和茅波先生在一聲爆雷贏得美麗傳奇！