中環出更：龍鳳胎未夠喉 李文斌又添丁
已有一對龍鳳胎嘅前仁濟醫院董事局主席李文斌（Edmond）啱啱周日又添丁。身為保良局總理嘅李太何芷韻（Amanda）順利誕下六磅重嘅BB，係仔嚟嘅，頭髮濃密似足媽媽，而一雙大眼就似足爸爸。
妻起初作嘔以為食錯嘢
再為人父，Edmond笑言今次淡定好多，不過太太懷孕初期，曾出現蝦碌片段。話說Amanda起初唔知有咗，有排突作嘔作悶，仲以為食錯嘢，直至後期不適加劇，一搵醫生檢查先知原來有咗四個半月，老公都笑佢烏龍。
李家再添一員，Edmond話期望B仔健健康康成長已足夠。咁阿仔叫乜名？Edmond話，中文名會由爺爺李運強改，跟番族譜，英文名就跟大仔一樣，用A字行頭，取名Alain喎。三個夠晒數未？Edmond話，到底生定唔生，未有時間同太太討論，一切順其自然。
卓妮