中環出更：純官勞氣：不如收番馬場起樓
政府建議喺新界東北收地發展新市鎮嘅計劃，一石激起千重浪，佔地達一百七十公頃嘅粉嶺高爾夫球場，更成為眾人覬覦焦點。新世界發展主席鄭家純（純官）日前出席一個活動時，承認自己擁有粉嶺高球會會籍，仲經常去打波添，對於有人話要收番高球場笪地起屋，佢好勞氣咁提出反建議話，跑馬地馬場夠晒闊落，不如又收番嚟起樓啦！
指城市發展須平衡
純官話，呢個球會已有百幾年歷史，好多代人都享用緊呢個設施，一路相安無事，依家因為香港搵唔到地方起樓，就話要收番，真係講唔過去。佢好勞氣話，市區夠有好多花園地啦，唔通又收番嚟起樓？佢愈講愈激氣，鬥氣話點解唔收番跑馬地馬場嚟發展呢？係喎！香港依家陷入「盲搶地」，純官嘅建議都幾有創意吖！
身為本港大地產商之一，純官好認真話，城市發展要顧及平衡，除咗住宅之外，仲需要其他設施。佢認為解決粉嶺高球場問題，應該朝住普及化方向改善，將公眾人士入場打波嘅收費再降低，令到更多市民受益。
卓妮